Xırdalan-Sumqayıt dəmir yolu xətti üzrə sərnişin qatarlarının hərəkətinin bərpası istiqamətində hazırlıq işlərinə başlanılıb.

Realmedia.info xəbər verir ki, bu barədə Azərbaycan Dəmir Yolları (ADY) məlumat yayıb.

Bildirilib ki, “Bakı şəhərində və ətraf ərazilərdə nəqliyyat infrastrukturunun təkmilləşdirilməsinə dair 2025–2030-cu illər üçün Dövlət Proqramı”nın icrası çərçivəsində Xırdalan-Güzdək sahəsində dəmir yolu xətlərinin altından yeni avtomobil yolu keçidinin inşası tamamlanıb.

Bununla əlaqədar dəmir yolu ilə sözügedən istiqamətdə sərnişindaşımanın bərpası üçün hazırlıq işlərinə başlanılıb.

Hazırda Xırdalan-Sumqayıt sahəsində yol infrastrukturuna baxış keçirilir. Eyni zamanda, bu istiqamətdə təyin olunacaq yeni reyslər üzrə istismara veriləcək hərəkət tərkiblərinin təmiri işləri davam etdirilir.

ADY-nin məlumatına görə, bütün hazırlıq işləri başa çatdırıldıqdan sonra Bakı-Xırdalan-Sumqayıt marşrutu üzrə qatarların Sumqayıta hərəkəti yeni tədris ili başlayanadək bərpa olunacaq.

Bərpa ediləcək sərnişin qatarları əvvəlki qaydada həftənin bütün günləri mövcud dayanacaqlar üzrə hərəkət edəcək.

Sərnişinlərin səfərləri daha rahat planlaşdırması üçün yeni reyslərin hərəkət cədvəli barədə əlavə məlumatın aidiyyəti qurum tərəfindən açıqlanacağı gözlənilir.

Realmedia.info