Kəlbəcərdə mina partlayışı nəticəsində xəsarət alan 73 yaşlı çobanın ayağı amputasiya edilib.

Realmedia.info xəbər verir ki, hadisə avqustun 13-də işğaldan azad edilmiş Kəlbəcər rayonunun Sarıyel kəndi ərazisində baş verib.

Daxili İşlər Nazirliyi (DİN), Baş Prokurorluq və Azərbaycan Respublikasının Minatəmizləmə Agentliyinin (ANAMA) yaydığı birgə məlumata görə, 1953-cü il təvəllüdlü, Tərtər rayonunun Qaynaq kənd sakini Kamran Şükür oğlu Süleymanov minalardan təmizlənməmiş ərazidə mal-qara otararkən mina partlayışına düşüb.

Hadisə nəticəsində xəsarət alan şəxs avqustun 14-də saat 03:30 radələrində Gəncə Şəhər Birləşmiş Xəstəxanasının nəzdində fəaliyyət göstərən Abbas Səhhət adına xəstəxanaya hospitalizasiya olunub.

TƏBİB-in məlumatına görə, pasiyentə sağ topuq nahiyəsinin amputasiyası diaqnozu qoyulub və zəruri tibbi xidmətlər göstərilib.

Hazırda onun müalicəsi davam etdirilir. Həkimlərin qiymətləndirməsinə əsasən, pasiyentin vəziyyəti orta ağırdır.

Faktla bağlı Kəlbəcər Rayon Prokurorluğunda araşdırma aparılır.