2026-cı il məzunlarının diplom, attestat və digər elektron təhsil sənədləri “mygov” platformasına inteqrasiya olunub.

Yeni imkan məzunlara təhsil müəssisələri tərəfindən elektron imza ilə təsdiqlənmiş sənədlərinə rəqəmsal formada çıxış əldə etməyə imkan verir.

Hazırda xidmət yalnız my.gov.az portalında aktivdir. Yaxın günlərdə elektron təhsil sənədlərinin “mygov” mobil tətbiqində də istifadəyə verilməsi nəzərdə tutulur.

Məzunlar elektron sənədlərinə baxmaq üçün my.gov.az portalında “Təhsil” bölməsinə daxil olaraq “Elektron təhsil sənədlərim” xidmətindən yararlana bilərlər. Xidmətə keçid etdikdə vətəndaşın adına mövcud olan elektron təhsil sənədləri siyahı şəklində təqdim olunur. Müvafiq sənədi seçməklə onun rəqəmsal versiyasına baxmaq mümkündür.

Elektron sənədin həqiqiliyini necə yoxlamaq olar?

Rəqəmsal təhsil sənədlərinin həqiqiliyini yoxlamaq üçün sənəd üzərində yerləşdirilmiş QR kodu mobil telefonun kamerası vasitəsilə oxutmaq mümkündür.

Bundan əlavə, edu.gov.az saytının “Sənəd Yoxlama” səhifəsində sənədin nömrəsini və doğum tarixini daxil etməklə də sənədin doğruluğunu yoxlamaq mümkündür.

Qeyd edək ki, indiyədək vətəndaşlara aid diplom və bir sıra digər təhsil sənədləri “mygov” platformasına inteqrasiya edilib.

Beləliklə, əvvəlki illərin məzunları da diplomlarına “mygov” platforması vasitəsilə rəqəmsal formada baxa bilərlər.

Realmedia.info