Sabahdan “Bakı Metropoliteni” QSC tərəfindən “qırmızı” və “yaşıl” metro xətlərinin ayrılması layihəsi çərçivəsində əsas tikinti mərhələsinə başlanılır.

Realmedia.info xəbər verir ki, tikinti işlərinin təxminən 10-11 ay davam edəcəyi gözlənilir. Bu müddət ərzində “Nizami” – “28 May” stansiyaları arasında qatarların hərəkəti dayandırılacaq.

Layihə Prezident İlham Əliyevin Sərəncamı ilə təsdiqlənmiş **“Bakı şəhərində və ətraf ərazilərdə nəqliyyat infrastrukturunun təkmilləşdirilməsinə dair 2025-2030-cu illər üçün Dövlət Proqramı”**na uyğun həyata keçirilir.

Layihənin əsas məqsədi “qırmızı” və “yaşıl” xətlər arasındakı asılılığı aradan qaldırmaq, stansiyalarda sıxlığı azaltmaq, qatarlararası intervalı minimuma endirmək və metroda hərəkətin dayanıqlılığını artırmaqdır.

Metroda hərəkət necə təşkil olunacaq?

Tikinti müddətində metro qatarlarının hərəkəti aşağıdakı qaydada təşkil ediləcək:

- “28 May” – “Nizami” mənzilində sərnişindaşıma dayandırılacaq.
- “Qırmızı xətt” üzrə qatarlar “İçərişəhər” – “Əhmədli” marşrutu ilə 2 dəqiqə 30 saniyə intervalla hərəkət edəcək.
- “Yaşıl xətt” üzrə qatarlar “Dərnəgül” – “Nizami” marşrutu ilə 3 dəqiqə 30 saniyə intervalla işləyəcək.
- “Cəfər Cabbarlı” – “Xətai” mənzilində məkik hərəkət rejimi dəyişməyəcək və interval 7 dəqiqə olacaq.
- “Bənövşəyi xətt” üzrə “Xocəsən” – “8 Noyabr” marşrutunda 8 dəqiqəlik interval saxlanılacaq.

İşlər çərçivəsində “Cəfər Cabbarlı” – “Nizami” mənzilini birləşdirəcək 200 metrlik yeni tunellərin inşasına başlanacaq.

Sərnişinlər üçün 6 yeni ekspres avtobus xətti

“28 May” və “Nizami” stansiyaları arasında metro əlaqəsinin müvəqqəti dayandırılması ilə əlaqədar yerüstü nəqliyyatda əlavə tədbirlər görüləcək.

Azərbaycan Yerüstü Nəqliyyat Agentliyi (AYNA) tərəfindən 6 yeni ekspres avtobus marşrutu istifadəyə verilib:

- M1 – “Elmlər Akademiyası” – “28 May”;
- M2 – “İnşaatçılar” – “Nizami” – “28 May”;
- M3 – “20 Yanvar” – “Nizami” – “28 May”;
- M4 – “20 Yanvar” – “Koroğlu”;
- M5 – “20 Yanvar” – “Gənclik”;
- M6 – “Elmlər Akademiyası” – “Gənclik”.

Ekspres avtobuslar ödənişli əsaslarla fəaliyyət göstərəcək. Onların hərəkəti metronun iş rejiminə uyğunlaşdırılaraq 06:00-dan 00:00-dək təşkil olunacaq.

Bundan əlavə, 2, 6, 7A, 9, 10, 14, 17, 18, 26, 61, 65, 79, 85, 88, 88A, 93, 133, 165, 199 və 202 nömrəli marşrutlarda avtobusların sayı artırılacaq və intervallar azaldılacaq.

Layihə başa çatdıqdan sonra

“Qırmızı xətt” üzrə “İçərişəhər” dönmə kamerasının tikintisinin də davam etdiyi bildirilib. Bu layihənin 2028-ci ilin ikinci yarısında tamamlanması planlaşdırılır.

Müvafiq infrastruktur layihələri tam istifadəyə verildikdən sonra “qırmızı” və “yaşıl” xətlər üzrə qatarlararası intervalların 2 dəqiqəyədək azaldılması mümkün olacaq.