Samux rayonunda qeydə alınan qarayara hadisəsi ilə bağlı ilkin epidemioloji araşdırmaların nəticələri açıqlanıb.

Realmedia.info xəbər verir ki, Səhiyyə Nazirliyi, Azərbaycan Qida Təhlükəsizliyi Agentliyi (AQTA) və Tibbi Ərazi Bölmələrini İdarəetmə Birliyinin (TƏBİB) yaydığı birgə məlumata görə, xəstəliyə şübhəli bilinən şəxslərin iribuynuzlu heyvanlarla təmasda olduğu müəyyən edilib.

Şübhəli şəxslərdən birindən götürülmüş müayinə materialının laborator müayinəsi nəticəsində qarayara xəstəliyi diaqnozu təsdiqlənib.

Hazırda xəstəliklə təmasda olan şəxslər müəyyənləşdirilərək tibbi müşahidəyə cəlb olunublar. Dəri yarası müşahidə edilən şəxslərdən laborator müayinələrin aparılması üçün nümunələr götürülüb.

Məlumata əsasən, xəstə heyvanla təmasda olan 9 nəfər aşkarlanıb. Onlar Abbas Səhhət adına Gəncə Şəhər Birləşmiş Xəstəxanasının yoluxucu xəstəliklər şöbəsində izolyasiya ediliblər. Sözügedən şəxslərin əsasən Samux rayon sakinləri olduğu bildirilib.

Onlardan laborator müayinə üçün nümunələr götürülərək Şəmkir Regional Xüsusi Təhlükəli İnfeksiyalara Nəzarət Mərkəzinə göndərilib.

Qarayara necə yayılır?

Mütəxəssislərin bildirdiyinə görə, qarayara xəstəliyinin törədicisi torpaq mənşəlidir və dünyanın müxtəlif ərazilərində rast gəlinir.

Qarayara əsasən xəstə və ya tələf olmuş heyvanlarla, həmçinin onların yoluxmuş toxumaları və məhsulları ilə təmas nəticəsində insana keçən zoonoz xəstəlikdir.

Xəstəliyin insandan-insana ötürülməsi isə olduqca nadir hallarda baş verir. Xəstə heyvanın termiki emal olunmuş ətinin və həmin ətdən hazırlanmış qidaların istehlakının qarayaraya yoluxmaya səbəb olmadığı bildirilib.

Hazırda hadisə aidiyyəti dövlət qurumlarının nəzarətindədir və zəruri epidemioloji tədbirlər həyata keçirilir.

Rəsmi məlumata görə, əhalinin geniş şəkildə yoluxması müşahidə edilmir və vətəndaşların narahatlığına əsas yoxdur.

Vətəndaşlara xəstə və ya tələf olmuş heyvanlarla, eləcə də şübhəli heyvan mənşəli məhsullarla təmasdan çəkinmək tövsiyə olunur. Xəstəliyə şübhə yaradan hər hansı əlamət müşahidə edildikdə isə vaxt itirmədən tibb müəssisəsinə müraciət etmək lazımdır.