Sosial şəbəkələrdə çiyələyə təhlükəli kimyəvi maddələrin vurulmasını əks etdirən görüntülər geniş müzakirələrə səbəb olub.

Realmedia.info xəbər verir ki, görüntülərdə danışan şəxsin məhsulu “zəhər” adlandırması və zarafatla “çiyələyin ürəyi tutub” deməsi istehlakçılar arasında ciddi narahatlıq yaradıb.

Məlumata görə, kadrlar Cəlilabad rayonunun Privolnoye kəndində çəkilib. Görüntülərlə bağlı fermer Natiq Bədirov açıqlama verərək videonun zarafat məqsədilə lentə alındığını bildirib:

“Orada istifadə olunan dərmanlar gəmiricilərə və həşəratlara qarşıdır, insana heç bir ziyanı yoxdur”.
Digər təsərrüfat sahibləri də istifadə edilən maddələrin bioloji preparatlar olduğunu və insan sağlamlığı üçün təhlükə yaratmadığını qeyd ediblər.

Qida təhlükəsizliyi üzrə ekspert Seymur Qafarov isə bildirib ki, çiyələyin mövsümdən əvvəl yetişdirilməsi müəyyən risklər daşıyır. Onun sözlərinə görə, həddindən artıq gübrə istifadəsi və ya dozanın düzgün tənzimlənməməsi məhsulda hormonal təsirlərə səbəb ola bilər. Ekspert xüsusilə uşaqlara və hamilə qadınlara mövsümdənkənar çiyələyin normadan artıq istifadəsini tövsiyə etmir.

Məsələ ilə bağlı Azərbaycan Qida Təhlükəsizliyi Agentliyi (AQTA) tərəfindən bildirilib ki, yayılan görüntülər dərhal nəzarətə götürülüb və araşdırmalara başlanılıb. Agentlik əməkdaşları Natiq Bədirova məxsus təsərrüfatda monitorinq həyata keçiriblər.

Qurumdan verilən məlumata görə, təsərrüfatda istifadə olunan preparatlardan və yetişdirilən çiyələkdən nümunələr götürülərək laborator analizlərə təqdim olunub. Eyni zamanda təsərrüfat sahibi ilə maarifləndirici söhbətlər aparılıb.

Qeyd edilib ki, laborator nəticələr ictimaiyyətə əlavə olaraq açıqlanacaq.

Hazırda bazarlarda çiyələyin qiyməti 4-8 manat arasında dəyişir və satışa çıxarılan məhsullar əsasən Şəmkir, Cəlilabad rayonu və Lənkəran ərazilərindəki istixanalardan gətirilir.