Ağdərə rayonunun Sırxavənd kəndi ərazisində mina partlayışı nəticəsində xəsarət alan şəxsin son vəziyyəti açıqlanıb.

Tibbi Ərazi Bölmələrini İdarəetmə Birliyinin (TƏBİB) məlumatına görə, 1967-ci il təvəllüdlü kişi aprelin 26-da saat 14:00 radələrində Bərdə Rayon Mərkəzi Xəstəxanasına çatdırılıb. Ona partlayış travması və sol aşağı ətrafın aşıq baldır oynağı səviyyəsində travmatik amputasiyası diaqnozu qoyulub. Həkimlər yaralının vəziyyətini ağır qiymətləndirir və müalicə davam etdirilir.

Hadisə ilə bağlı Daxili İşlər Nazirliyi, Baş Prokurorluq və Azərbaycan Minatəmizləmə Agentliyi (ANAMA) birgə məlumat yayıb. Bildirilib ki, hadisə işğaldan azad olunmuş ərazidə, minalardan təmizlənməmiş sahədə baş verib. Yaralı Xocalı rayonunun Yenibinə kənd sakini Vüqar Əhmədovdur və o, keçmiş təmas xəttində piyada əleyhinə minaya düşüb.

Faktla bağlı Tərtər Rayon Prokurorluğunda araşdırma aparılır. Rəsmi qurumlar vətəndaşlara təhlükəli ərazilərə daxil olmamağı, mina xəbərdarlıq nişanlarına ciddi əməl etməyi və çəpərlənmiş zonalara müdaxilə etməməyi bir daha xatırladıb.