Realmedia.info xəbər verir ki, Ümumdünya Səhiyyə Təşkilatının təşəbbüsünə uyğun olaraq, 2026-cı ilin 19-25 aprel tarixlərində ölkəmizdə “İmmunlaşdırma həftəsi” təşkil olunur. Bununla bağlı səhiyyə naziri tərəfindən müvafiq əmr imzalanıb.

Əmrə əsasən, respublikanın bütün şəhər və rayonlarında immunizasiya tədbirlərinin genişləndirilməsi, xüsusilə peyvənddən kənarda qalan uşaqların vaksinasiyaya cəlb olunması, əhali arasında maarifləndirmə işlərinin gücləndirilməsi və peyvəndlərlə əhatə səviyyəsinin artırılması nəzərdə tutulur.

Mövzu ilə bağlı Respublika Gigiyena və Epidemiologiya Mərkəzinin İmmunoprofilaktika bölməsinin müdiri Gülafət Azadəliyeva bildirib ki, “İmmunlaşdırma həftəsi”nin əsas məqsədi cəmiyyət arasında peyvəndləmənin əhəmiyyəti barədə məlumatlılığı artırmaq və yoluxucu xəstəliklərin qarşısını almaqdır.

Onun sözlərinə görə, peyvəndlər qızılca, məxmərək, epidemik parotit, göyöskürək, difteriya, tetanus, poliomielit, vərəm, hepatit B, pnevmokok infeksiyası və qrip kimi xəstəliklərə qarşı effektiv qorunma təmin edir. Bu isə həm fərdi sağlamlığın qorunmasına, həm də kollektiv immunitetin formalaşmasına xidmət edir.

Qeyd olunub ki, ölkəyə gətirilən bütün peyvəndlər beynəlxalq standartlara uyğun olaraq ciddi nəzarətdən keçirilir və onların saxlanılması “soyuq zəncir” sistemi vasitəsilə təmin olunur. Tibb müəssisələrində vaksinlərin keyfiyyətinə mütəmadi nəzarət həyata keçirilir.

Mütəxəssis vurğulayıb ki, uşaqların peyvənd olunması onların sağlam inkişafı üçün həyati əhəmiyyət daşıyır. Peyvəndlər yalnız uşaqları deyil, eyni zamanda cəmiyyətdə digər həssas qrupları da qoruyur.

Azərbaycanda profilaktik peyvənd təqvimi dövlət proqramına uyğun şəkildə tətbiq olunur və dövlət tibb müəssisələrində bu xidmətlər ödənişsiz həyata keçirilir. Valideynlərə tövsiyə olunur ki, övladlarını vaxtında peyvənd etdirsinlər və bu məsələdə yalnız mütəxəssis rəyinə əsaslansınlar.