Dövlət Statistika Komitəsinin açıqladığı son məlumatlar ölkədə dərman və tibbi ləvazimatların satışında ciddi artım olduğunu göstərir.
Rəsmi statistikaya əsasən, 2025-ci ilin yanvar–noyabr aylarında pərakəndə ticarət şəbəkəsində 1 milyard 424,1 milyon manatlıq əczaçılıq məhsulları və tibbi ləvazimatlar satılıb. Bu göstərici 2024-cü ilin eyni dövrü ilə müqayisədə 24,3 faiz çoxdur.
Məlumata görə, təkcə noyabr ayında əhali 138,6 milyon manatlıq dərman və tibbi ləvazimat alıb.
Son illər aptek və klinikaların sayının artması fonunda bu rəqəmlər cəmiyyətdə müxtəlif suallar doğurub. Əsas suallardan biri də xəstəliklərin artıb-artmaması ilə bağlıdır.
Mövzu ilə bağlı Ölkə.Az-a danışan tibb məsələləri üzrə ekspert, professor Adil Qeybulla bildirib ki, açıqlanan statistik göstəricilər normaldır.
Onun sözlərinə görə, aptek və klinikaların sayının artması mövcud tələbatla birbaşa bağlıdır:
“Əhali artır, xüsusilə Bakı şəhərində əhali sıxlığı yüksəlir və bu da statistikaya təsirsiz ötüşmür. Əhali artdıqca xəstəliklərin sayının artması təbiidir”.
Professor qeyd edib ki, koronavirus pandemiyasından sonra bir sıra xəstəliklərin yayılması davam edir, bu isə dərman və tibbi ləvazimatlara tələbatın artmasına səbəb olur:
“Statistikaya təkcə apteklərdə satılan dərmanlar deyil, həmçinin xəstəxanalarda, əməliyyat otaqlarında istifadə olunan tibbi sərfiyyat materialları da daxildir. Bu baxımdan rəqəmlərdə qeyri-adi hal yoxdur”.
A.Qeybulla vurğulayıb ki, bu artım tibbi xidmətin keyfiyyətinin aşağı düşməsi ilə bağlı deyil və oxşar tendensiya dünyanın əksər ölkələrində müşahidə olunur. Onun fikrincə, növbəti illərdə də dərman və tibbi ləvazimatların istehlakı artacaq.