Bakıda ulu öndər Heydər Əliyevin xatirəsinə həsr olunmuş dövlət qurumları arasında minifutbol turniri başa çatıb.

Realmedia.info xəbər verir ki, yarışın həlledici qarşılaşmaları və mükafatlandırma mərasimi Bakı Tennis Akademiyasında təşkil olunub.

Final görüşündə SOCAR komandası Azərişıq kollektivinə 5:0 hesabı ilə qalib gələrək turnirin çempionu olub. Bütün oyunlarını qələbə ilə başa vuran SOCAR üzvləri qızıl medallarla təltif ediliblər. “Azərişıq” gümüş, Ədliyyə Nazirliyinin komandası isə bürünc medallara sahib çıxıb.

Üçüncü yer uğrunda keçirilən görüşdə Ədliyyə Nazirliyinin kollektivi Baş Prokurorluq komandasını 2:1 hesabı ilə məğlub edib.

SOCAR komandasının baş məşqçisi Fuad Rzayev turnirdə güclü kollektivlərin mübarizə apardığını bildirib:

“Qələbə qazanacağımızı gözləyirdik, lakin finaldakı böyükhesablı qalibiyyət bizim üçün də sürpriz oldu. Bu uğur oyunçularımızın böyük zəhmətinin nəticəsidir”.

Elm və təhsil naziri, Azərbaycan Basketbol Federasiyasının prezidenti Emin Əmrullayev isə bildirib ki, bu cür yarışlar gənclərin idmana marağının artmasına töhfə verir:

“Fərqli peşə sahiblərinin bir araya gəlib belə turnirlərdə mübarizə aparması çox xoş haldır və təqdirəlayiqdir”.

Gənclər və idman naziri Fərid Qayıbov da turnirin yüksək səviyyədə təşkil olunduğunu vurğulayaraq, SOCAR komandasını çempionluq münasibətilə təbrik edib.