Azərbaycan Prezidenti İlham Əliyev Roma Papası XIV Leo Həzrətlərinə tacqoyma günü münasibətilə təbrik məktubu göndərib.

Məktubda Azərbaycan ilə Müqəddəs Taxt-Tac arasında münasibətlərin qarşılıqlı hörmət və anlaşma əsasında inkişaf etdiyi vurğulanıb. Prezident İlham Əliyev qeyd edib ki, bu əlaqələr dinlərarası harmoniya, multikulturalizm və sivilizasiyalararası dialoqun təşviqinə xidmət edir.

Dövlət başçısı məktubunda Azərbaycanın dünyada multikulturalizmin əsas ünvanlarından biri olduğunu bildirib, ölkədə bütün dinlərin nümayəndələri üçün bərabər şərait yaradıldığını diqqətə çatdırıb. Həmçinin Bakıda yeni katolik kilsəsinin təməlinin qoyulmasının dinlərarası harmoniyanın növbəti nümunəsi olduğu qeyd edilib.

Prezident İlham Əliyev Heydər Əliyev Fondu ilə Müqəddəs Taxt-Tac arasında uzun illərdir davam edən əməkdaşlığa da toxunub. Məktubda Fondun dəstəyi ilə Vatikanda həyata keçirilən bərpa layihələrinin mədəni və dini irsin qorunmasına mühüm töhfə verdiyi vurğulanıb.

Sonda dövlət başçısı Roma Papası XIV Leoya möhkəm cansağlığı, uzun ömür və müqəddəs missiyasında uğurlar arzulayıb.