Albaniyanın paytaxtı Tiranada keçirilən Avropa çempionatında Azərbaycanın qadın və sərbəst güləşçiləri uğurlu çıxışları ilə diqqət çəkiblər.

Realmedia.info xəbər verir ki, qadın güləşçisi Birgül Soltanova (65 kq) bürünc medal uğrunda qarşılaşmada türkiyəli Beyza Akkuşa 2:4 hesabı ilə məğlub olaraq yarışı beşinci pillədə başa vurub.

Digər təmsilçimiz Ruzanna Məmmədova (62 kq) da eyni nəticəni göstərib. Bununla yanaşı, Jalə Əliyeva (57 kq) Arina Demçenkaya (UWW) qalib gələrək bürünc medal qazanıb. Daha əvvəl isə Günay Qurbanova (59 kq) da bürünc medala sahib çıxmışdı.

Beləliklə, Azərbaycanın qadın güləşçiləri qitə birinciliyini iki bürünc medalla tamamlayıblar.

Sərbəst güləşdə isə İslam Bazarqanov (57 kq) yarımfinalda gürcüstanlı Roberti Dinqaşvilini 11:1 hesabı ilə məğlub edərək finala yüksəlib. Cəbrayıl Hacıyev (79 kq) isə yarımfinalda məğlub olsa da, bürünc medal uğrunda görüşə çıxacaq.

Xatırladaq ki, daha əvvəl yunan-Roma güləşçilərindən Həsrət Cəfərov (67 kq) və Qurban Qurbanov (82 kq) qızıl, Rəşad Məmmədov (55 kq), Nihat Məmmədli (60 kq) və İslam Abbasov (87 kq) isə bürünc medal qazanıblar. Yunan-Roma güləşi üzrə milli komanda Avropa çempionu olub.