Bakı şəhərinin Xəzər rayonu, Aeroport şosesində baş verən ağır yol-nəqliyyat hadisəsi ilə bağlı bəzi təfərrüatlar açıqlanıb.

Realmedia.info xəbər verir ki, qəza nəticəsində həyatını itirən şəxsin Mansur Güləxan oğlu İmanov olduğu müəyyən edilib. Onun Cəlilabad rayonunun Uzuntəpə kənd sakini olduğu bildirilir.

Məlumata görə, mərhumun övladı bu yaxınlarda hərbi xidmətə yola düşüb.

Hadisə ilə bağlı Fövqəladə Hallar Nazirliyi məlumat yayıb. Bildirilib ki, qəza barədə məlumat daxil olduqdan dərhal sonra əraziyə nazirliyin Xüsusi Riskli Xilasetmə Xidmətinin xilasediciləri cəlb olunublar.

Hadisə yerində aparılan ilkin qiymətləndirmə zamanı “Mercedes” və XPeng markalı minik avtomobillərinin toqquşduğu müəyyən edilib. Nəticədə “Mercedes” markalı avtomobilin sürücüsü və sərnişini deformasiyaya uğramış nəqliyyat vasitəsində sıxılı vəziyyətdə qalıb.

Xilasedicilər tərəfindən sərnişin xilas edilib, sürücü Mansur İmanovun meyiti isə avtomobildən çıxarılaraq aidiyyəti üzrə təhvil verilib.

Faktla bağlı müvafiq qurumlar tərəfindən araşdırmalar davam etdirilir.