Bakının Səbail rayonu, Badamdar qəsəbəsində yaşayan bir qrup sakin qəbiristanlıq ərazisində yaranmış vəziyyətdən narazıdır.

Realmedia.info xəbər verir ki, sakinlər məsələ ilə bağlı Baku TV-nin qaynar xəttinə müraciət edərək bildiriblər ki, qəbiristanlıq ərazisində aparılan qanunsuz tikinti işləri nəticəsində torpaq sürüşməsi və dağıntı baş verib. Onların iddiasına görə, yaxınlarına məxsus bəzi qəbirlər dağıntıların altında qalıb.

Şikayətçilərin sözlərinə görə, məsələ ilə bağlı dəfələrlə aidiyyəti qurumlara müraciət edilsə də, problem hələ də tam həllini tapmayıb.



Sakinlərdən biri baş verənləri “vandalizm” adlandıraraq bildirib ki, əvvəllər ərazidə mövcud olan dəmir hasar sökülüb və həmin ərazidə üçmərtəbəli tikili inşa edilib:
“Qəbirlər ağırlığa tab gətirmədi və dağıntının altında qaldı”, – deyə o qeyd edib.

Məsələ ilə bağlı Səbail Rayon İcra Hakimiyyətindən verilən açıqlamada isə bildirilib ki, cari ilin mart ayının sonu və aprel ayının əvvəlində yağan intensiv yağışlar nəticəsində Badamdar qəsəbəsində yerləşən qəbiristanlığın bir hissəsində torpaq sürüşməsi baş verib. Hadisə nəticəsində bəzi qəbir daşlarına ziyan dəyib.

Qurumdan bildirilib ki, hadisədən dərhal sonra əraziyə baxış keçirilib və fəsadların aradan qaldırılması üçün aidiyyəti qurumlara rəsmi müraciətlər ünvanlanıb. Hazırda ərazidə təmizlik və dağılan qəbir daşlarının bərpası istiqamətində işlər davam etdirilir.