Bakının Xətai rayonu, Zığ qəsəbəsi ərazisində yaşayan sakinlər ciddi problemlərlə üz-üzə qaldıqlarını bildirirlər.

Realmedia.info xəbər verir ki, Baku TV-nin qaynar xəttinə müraciət edən Elvin Şükürlü küçəsi sakinləri yaşadıqları ərazidə sahibsiz itlərin çoxalmasından və antisanitar vəziyyətdən şikayət ediblər. Onların sözlərinə görə, küçəyə çıxmaq belə təhlükəli hala gəlib.

Sakinlər bildirirlər ki, çirkab suların dənizə axıdıldığı kanalın üstünün açıq olması xüsusilə uşaqlar üçün ciddi təhlükə yaradır. Qeyd olunur ki, yaxın günlərdə məktəbli bir uşaq ehtiyatsızlıqdan həmin kanala düşərək boğulma təhlükəsi ilə üzləşib.

Hadisə şahidlərindən biri bildirib:

“Uşaq gözümün qabağında kanala düşdü. Düşünmədən suya atılıb onu çıxardım, sonra özüm orada qaldım. Qonşular məni çətinliklə xilas etdilər. Orada olmasaydım, indi həmin uşaq həyatda olmayacaqdı”.

Digər sakin isə ərazidə yayılan kəskin qoxudan şikayət edib:
“Üfunət iyindən həyətə çıxa bilmirik, nəfəs almaq mümkün deyil. Xəstəlik yayılmasından qorxuruq”.

Məsələ ilə bağlı İri Şəhərlərin Birləşmiş Su Təchizatı Xidməti tərəfindən bildirilib ki, artıq müvafiq qurum məlumatlandırılıb. Qurum əməkdaşlarının əraziyə baxış keçirəcəyi və nəticələrə uyğun olaraq zəruri tədbirlərin görüləcəyi qeyd olunub.