Şamaxı şəhərinin Yeni Yaşayış Massivində yaşayan sakinlər illərdir davam edən yol probleminin onların gündəlik həyatını çətinləşdirdiyini bildirirlər.

Realmedia.info xəbər verir ki, məsələ ilə bağlı sakinlər Baku TV-nin qaynar xəttinə müraciət edərək, təxminən 20 ilə yaxındır mövcud olan yaşayış massivində yolların yararsız vəziyyətdə qaldığını diqqətə çatdırıblar.

Qeyd olunur ki, minə yaxın ailənin yaşadığı ərazidə beşə yaxın küçə uzun illərdir asfalt üzü görməyib.

Sakinlərin sözlərinə görə, xüsusilə yağışlı havalarda küçələr keçilməz palçığa çevrilir, yay aylarında isə toz-torpaq yaşayışı daha da çətinləşdirir.

“Bu yoldan hər gün istifadə edirik. Uşaqları məktəbə aparmaq, gündəlik hərəkət etmək əziyyətə çevrilib. Maşınlarımız tez-tez sıradan çıxır”, – deyə sakinlər narazılıqlarını ifadə ediblər.

Şamaxı Rayon İcra Hakimiyyətindən isə bildirilib ki, şəhərdaxili yolların asfaltlaşdırılması mərhələli şəkildə həyata keçirilir. Rəsmi açıqlamaya görə, proqram çərçivəsində bəzi küçələrdə işlərə başlanılıb və proses davam etdiriləcək.

Sakinlər isə problemin daha sürətli həllini gözlədiklərini deyirlər.