Bir müddət əvvəl yağan intensiv yağışlar Bakı ətrafındakı kənd və qəsəbələrdə yaşayan sakinlər arasında ciddi narahatlığa səbəb olub.

Məlumata görə, bəzi vətəndaşlar evlərini su basması riski ilə üzləşməmək üçün çıxış yolunu mənzillərini satmaqda görürlər. Sakinlərin sözlərinə görə, güclü yağıntılar zamanı vəziyyətin daha da ağırlaşacağından ehtiyat edirlər.

Baku TV-yə danışan sakinlərdən biri bildirib ki, artıq bir neçə ailə evini satmaq üçün fürsət axtarır:

“Hazırda bizim küçədə altı-yeddi nəfər yağışsız havada evini satıb getmək üçün fürsət gözləyir. Mən özüm də evimi satmaq niyyətindəyəm. Aldığım evin üzərinə üçqat artıq xərc qoyub bərpa etmişəm, amma burada qalmaq artıq mümkün deyil”, – deyə o qeyd edib.

Məsələ ilə bağlı daşınmaz əmlak eksperti Elnur Fərzəliyev bildirib ki, torpaq və ev alarkən sənədlərin düzgünlüyü və ərazinin təyinatı mütləq yoxlanmalıdır. Onun sözlərinə görə, çıxarışı olan və “yaşayış məntəqələrinin torpaqları” kateqoriyasına daxil olan ərazilərdə kommunikasiya təminatı daha yaxşı olur və risklər nisbətən aşağı qiymətləndirilir.

Ekspert həmçinin vurğulayıb ki, ərazinin relyefi də vacib amildir:

“Çökək ərazilərdə yerləşən evlər güclü yağışlar zamanı subasma riskinə daha çox məruz qalır”, – deyə o bildirib.
Mütəxəssislər vətəndaşlara daşınmaz əmlak alarkən həm sənədlərə, həm də ərazinin coğrafi xüsusiyyətlərinə xüsusi diqqət yetirməyi tövsiyə edirlər.