Kimya və biologiya təmayüllü Respublika Liseyinin 9-cu sinif şagirdi Emin Mustafazadə böyük əzmkarlıq nümunəsi göstərərək həm ağır xəstəliyə qalib gəlib, həm də ölkə birincisi olub.

Realmedia.info xəbər verir ki, bu barədə “Azərbaycan Universitetləri” səhifəsi məlumat yayıb.

Bildirilib ki, Emin Mustafazadə 8-ci sinifdə Respublika Fənn Olimpiadasında qızıl medal qazanaraq yüksək nəticə əldə edib. Lakin daha sonra ağır xərçəng xəstəliyi səbəbindən bir il təhsilindən uzaq qalmalı olub.

Buna baxmayaraq, o, mübarizəsini davam etdirərək yenidən böyük uğura imza atıb.

Belə ki, Emin Mustafazadə bu günlərdə keçirilən Respublika Fənn Olimpiadasında 9-cu siniflər üzrə kimya fənni üzrə ölkə birincisi olub və qızıl medal qazanıb.

Qeyd edək ki, Emin daha əvvəl – 7-ci sinifdə oxuyarkən Respublika Fənn Müsabiqəsində də qızıl medal əldə edib.

Gənc məktəblinin uğuru sosial şəbəkələrdə böyük rəğbətlə qarşılanıb və əzmkarlığın nümunəsi kimi qiymətləndirilib.