Bu gün Azərbaycanın Milli Qəhrəmanı, şəhid polkovnik İlqar Mirzəyevin doğum günüdür.

İlqar Anzor oğlu Mirzəyev 1973-cü il mayın 8-də Gürcüstanın Qardabani şəhərində anadan olub. O, 1980-1990-cı illərdə həmin şəhərdə orta təhsil alıb.

Hərbi xidmətə böyük məsuliyyət və peşəkarlıqla yanaşan İlqar Mirzəyev uzun illər Azərbaycan Ordusunun müxtəlif hərbi hissələrində mühüm vəzifələrdə xidmət edib. O, Bakı Ali Ümumqoşun Komandanlıq Məktəbində artilleriya batareyasının komandiri vəzifəsində çalışıb, daha sonra müxtəlif hərbi hissələrdə qərargah rəisi, divizion komandiri və digər məsul postlarda fəaliyyət göstərib.

Qüsursuz xidmətinə görə ona mərhələli şəkildə kapitan, mayor və polkovnik hərbi rütbələri verilib.

Şəhid polkovnik Aprel döyüşləri zamanı göstərdiyi qəhrəmanlıqla da yadda qalıb. Tərtər rayonunun Talış istiqamətində gedən döyüşlərdə onun rəhbərliyi altında düşmənin mühüm müdafiə mövqeləri qısa müddətdə darmadağın edilib, strateji yüksəkliklər Azərbaycan Ordusunun nəzarətinə keçib.

2019-cu ildə 3-cü Ordu Korpusunun artilleriya rəisi vəzifəsinə təyin olunan İlqar Mirzəyev 2020-ci ilin iyulunda Tovuz istiqamətində baş verən döyüşlərdə ön xətdə olub.

Tovuz döyüşləri zamanı general-mayor Polad Həşimov ilə birlikdə döyüşlərə rəhbərlik edən İlqar Mirzəyev iyulun 14-də şəhidlik zirvəsinə ucalıb.

Şəhid polkovnik II Fəxri xiyabanda dəfn olunub.

Azərbaycan Prezidenti İlham Əliyevin 2020-ci il 9 dekabr tarixli sərəncamı ilə İlqar Mirzəyevə ölümündən sonra “Azərbaycanın Milli Qəhrəmanı” adı verilib.
Qeyd edək ki, şəhid polkovnikdən Elvin adlı oğlu və Gülnarə adlı qızı yadigar qalıb.