Aprelin 25-i Azərbaycanın Milli Qəhrəmanı Albert Aqarunovun doğum günüdür. Qarabağ savaşında göstərdiyi misilsiz qəhrəmanlıqla adını tarixə yazan Albert Aqarunov bu gün də xalqımız tərəfindən böyük ehtiramla yad edilir.

Realmedia.info xatırladır ki, Albert Aqarunov 1969-cu ildə Bakı şəhərində anadan olub. Suraxanı rayonundakı 154 saylı məktəbin səkkizinci sinfini bitirdikdən sonra peşə məktəbində sürücü-mexanik peşəsinə yiyələnib.

1987-ci ildə hərbi xidmətə çağırılan Albert xidmətini Gürcüstanda yerinə yetirib və tank komandiri olub. Hərbi xidmətdən sonra Bakıya qayıdaraq Suraxanıda Maşınqayırma Zavodunda fəaliyyət göstərib.

Vətən torpaqları işğal təhlükəsi ilə üz-üzə qalanda Albert tərəddüd etmədən könüllü şəkildə cəbhəyə yollanıb. O, tank komandiri kimi Şuşa cəbhəsində döyüşlərə qatılıb.

Xankəndi, Daşaltı və Cəmilli istiqamətlərində gedən döyüşlərdə düşmənin çoxsaylı canlı qüvvəsini və hərbi texnikasını məhv edən qəhrəman tankçı qısa zamanda döyüş yoldaşlarının və xalqın rəğbətini qazanıb.

1992-ci il mayın 8-də Şuşa uğrunda gedən həlledici döyüşlərdə Albert Aqarunov düşmənin iki tankını bir-birinin ardınca məhv edib. Lakin həmin an snayper gülləsinə tuş gələrək qəhrəmancasına şəhid olub.

Onun adı Qarabağ müharibəsində əfsanəyə çevrilmişdi. Hətta o dövrdə əsgərlər tanklarını “Albert” adlandırır, düşmən isə onun başına mükafat qoyurdu.

Azərbaycan Respublikası Prezidentinin 7 iyun 1992-ci il tarixli 833 saylı fərmanı ilə Albert Aqarunov ölümündən sonra “Azərbaycanın Milli Qəhrəmanı” adına layiq görülüb.

Bakıda Şəhidlər xiyabanında dəfn olunan qəhrəmanın xatirəsi daim əziz tutulur. Təhsil aldığı məktəb onun adını daşıyır, yaşadığı binaya xatirə lövhəsi vurulub, məktəbin qarşısında büstü qoyulub və 2019-cu ildə Nərimanov rayonunda heykəli ucaldılıb.