Bu gün Azərbaycan xalqı Milli Qəhrəman, şəhid gizir Mübariz İbrahimovun doğum gününü yad edir. Onun adı, qəhrəmanlığı və Vətənə bağlılığı hər zaman gələcək nəsillərə nümunə olaraq qalacaq.

Mübariz İbrahimov 7 fevral 1988-ci ildə Biləsuvar rayonunun Əliabad kəndində dünyaya gəlib. Uşaqlıqdan vətənpərvər ruhda böyüyən Mübariz gənc yaşlarından cəsarəti və qətiyyəti ilə seçilib.

Hərbi xidmətini başa vurduqdan sonra o, Vətən borcunu unutmadan 2009-cu ildə yenidən orduda xidmətə başlayıb. Cəbhə bölgəsində göstərdiyi igidlik, fədakarlıq və vətən sevgisi onun adı ilə əbədiləşib.
2010-cu il iyunun 18-dən 19-na keçən gecə göstərdiyi misilsiz qəhrəmanlıqla o, təkbaşına düşmən mövqelərinə hücum edib və şəhid olub. Bu igidlik Azərbaycan tarixində əbədi iz qoyub, onun adı xalqın qəlbində yaşayan qəhrəmanlıq simvoluna çevrilib.

Azərbaycan Respublikasının Prezidenti İlham Əliyevin sərəncamı ilə Mübariz İbrahimov ölümündən sonra “Azərbaycanın Milli Qəhrəmanı” fəxri adına layiq görülüb.

Bu gün biz onu xatırlayır, ona ehtiramımızı bildiririk. Mübariz İbrahimov Azərbaycan xalqının qüruru, Vətən uğrunda canından keçən qəhrəman şəhidimizdir. Onun xatirəsi daim yaşayacaq. Allah bütün şəhidlərimizə rəhmət eləsin!
Realmedia