Bu gün Azərbaycanın Milli Qəhrəmanı, şəhid general-mayor Polad İsrayıl oğlu Həşimovun doğum günüdür.
Polad Həşimov 2 yanvar 1975-ci ildə Qəbələ rayonunun Vəndam kəndində doğulub. Sonradan ailəsi ilə birlikdə Sumqayıta köçüb və 1992-ci ildə Sumqayıt şəhər 34 nömrəli tam orta məktəbi bitirib. Həmin il Heydər Əliyev adına Ali Hərbi Məktəbə daxil olub və 1995-ci ildə motoatıcı ixtisası üzrə məzun olub.
Hərbi xidmətinə gənc zabit kimi başlayan Polad Həşimov, Qarabağ və Tovuz döyüşlərində, eləcə də 2016-cı ilin Aprel döyüşlərində uğurlu əməliyyatlarda iştirak edib. Xidmət etdiyi dövrdə müxtəlif orden və medallarla təltif olunmuşdur. Talış yüksəkliklərindəki post onun şərəfinə “Polad postu” adlandırılmışdır.
2020-ci il iyulun 14-də Tovuz rayonunda düşmən hücumlarını dəf edən zaman qəhrəmancasına şəhid olan Polad Həşimov, ölümündən sonra Azərbaycanın Milli Qəhrəmanı adına layiq görülüb.
Onun xidməti və qəhrəmanlığı Azərbaycan xalqının yaddaşında əbədi yaşayır.