Rusiya Müdafiə Nazirliyi Moskva Hərbi Dairəsinin mətbuat zabiti, mayor Dmitri Şutovun vəfat etdiyini açıqlayıb.
Realmedia Teleqraf.az-a istinadən xəbər verir ki, bu barədə Müdafiə Nazirliyinin yaydığı nekroloqda məlumat yer alıb.
Bildirilib ki, mayor Dmitri Şutov son günlər Kupyansk istiqamətində xidməti vəzifələrini yerinə yetirərkən həyatını itirib.
“Nazirliyin İnformasiya və Kütləvi Kommunikasiyalar Departamenti dərin hüznlə mayor Dmitri Andreyeviç Şutovun vəfat etdiyini bildirir. O, Kupyansk istiqamətində döyüş tapşırıqlarını icra edərkən həlak olub”, – deyə məlumatda vurğulanıb.
Qeyd edək ki, Dmitri Şutov xüsusi hərbi əməliyyatlarda ilk günlərdən iştirak edib. O, “Qərb” qoşun qruplaşmasının mətbuat mərkəzində media nümayəndələrinin fəaliyyətinin təşkili ilə məşğul olub. 2024-cü ildə Moskva Hərbi Dairəsinin mətbuat xidməti zabiti vəzifəsinə təyin edilib.
Mayor Dmitri Şutovun 31 yaşı olub. Onun iki oğlu var. Məlumata görə, mayor ölümündən sonra “İgidliyə görə” II dərəcəli medalla təltif edilib.