Bu gün Azərbaycanın Milli Qəhrəmanı, igid zabit Şükür Həmidovun doğum günüdür.

Şükür Həmidov Azərbaycan Silahlı Qüvvələrinin şərəfli zabitlərindən biri kimi hər zaman vətənə sədaqəti, cəsarəti və döyüş ruhu ilə seçilib. O, xüsusilə 2016-cı ilin 2–5 aprel tarixlərində baş verən və tarixə Aprel döyüşləri kimi düşən hərbi əməliyyatlar zamanı böyük qəhrəmanlıq nümayiş etdirib.

Cəbrayıl rayonu istiqamətində yerləşən strateji əhəmiyyətli Lələtəpə yüksəkliyinin azad olunması uğrunda gedən döyüşlərdə onun göstərdiyi igidlik xüsusi qeyd olunub. Məhz bu xidmətlərinə görə Azərbaycan Respublikasının Prezidenti İlham Əliyevin 20 aprel 2016-cı il tarixli Sərəncamı ilə Şükür Həmidova Azərbaycanın Milli Qəhrəmanı adı verilib. O, uzun illərdən sonra bu ada sağlığında layiq görülən ilk şəxs kimi tarixə düşüb.

2020-ci ilin sentyabrında başlayan və xalqımızın şanlı Qələbəsi ilə nəticələnən İkinci Qarabağ müharibəsi zamanı da Şükür Həmidov ön cəbhədə olub. O, Cəbrayıl, Füzuli və Qubadlı istiqamətlərində gedən döyüşlərdə fəal iştirak edib, şəxsi nümunəsi ilə döyüşçülərə ruh verib.

22 oktyabr 2020-ci il tarixində isə doğma torpağı olan Qubadlının azadlığı uğrunda gedən döyüşlərdə qəhrəmancasına şəhid olub. Onun keçdiyi döyüş yolu, göstərdiyi şücaət və Vətənə olan sonsuz sevgisi hər zaman xalqımız üçün örnək olaraq qalacaq.

Bu gün onun əziz xatirəsi ehtiramla yad olunur. Ruhun şad olsun, qəhrəman!

Əziz İsmayılov.