Qətər ABŞ ilə koordinasiyalı şəkildə İranla aparılan danışıqlara dəstək məqsədilə vasitəçilər qrupunu Tehrana göndərib.

“Reuters” agentliyinin yaydığı məlumata görə, nümayəndə heyətinin əsas məqsədi ABŞ və İran arasında hazırlanmış sülh sazişi layihəsində hələ də razılaşdırılmamış məsələlərin həllinə yardım etməkdir.

Mənbələr bildirir ki, ilkin sülh layihəsində atəşkəsin tam təmin olunması, qarşılıqlı hücumların dayandırılması, həmçinin Hörmüz boğazında və regionda gəmiçiliyin sərbəstliyinin qorunması nəzərdə tutulur.

Qeyd olunur ki, Qətər daha əvvəl də Qəzza zolağındakı münaqişə daxil olmaqla bir sıra beynəlxalq proseslərdə vasitəçilik missiyası həyata keçirib. Lakin mart ayında İranın Qətər ərazisinə zərbələr endirməsindən sonra Doha Tehranla bağlı diplomatik proseslərdən geri çəkilmişdi.

Məlumata görə, Türkiyə, Misir və Pakistan da prosesdə dolayı vasitəçilik rolunda iştirak edir. ABŞ və İran arasında aparılan danışıqlarda müəyyən irəliləyişlərin olduğu bildirilsə də, tərəflər arasında bəzi əsas fikir ayrılıqları hələ də qalmaqdadır.