İslamabadda keçirilən ABŞ-İran danışıqları fonunda Vaşinqtonun Qətər və digər xarici banklarda saxlanılan İran vəsaitlərinin dondurulmasının ləğvinə razılıq verdiyi barədə məlumat yayılıb.

“Reuters” agentliyinin İranın yüksək vəzifəli mənbəsinə istinadən yaydığı xəbərə görə, bu addım danışıqlarda irəliləyiş kimi qiymətləndirilir və ABŞ-nin mümkün razılaşmaya ciddi yanaşdığını göstərir.

Məlumata əsasən, vəsaitlərin azad edilməsi Hörmüz boğazında təhlükəsiz keçidin təmin olunması ilə birbaşa əlaqələndirilir və bu məsələ hazırkı danışıqlarda əsas mövzulardan biri sayılır.

İran tərəfinin bəzi mənbələri azad edilə biləcək vəsaitin həcmini açıqlamasa da, digər rəsmi mənbə Qətərdə dondurulan təxminən 6 milyard dolların sərbəst buraxılmasının müzakirə olunduğunu bildirib. ABŞ tərəfi isə bu barədə hələlik rəsmi açıqlama verməyib.

Qeyd edək ki, həmin vəsaitlər ilk dəfə 2018-ci ildə ABŞ-nin o vaxtkı prezidenti Donald Tramp administrasiyasının İrana qarşı sanksiyaları bərpa etməsindən sonra dondurulmuşdu. Pullar İranın Cənubi Koreyaya neft satışından əldə etdiyi gəlirlər hesabına formalaşıb.

2023-cü ildə ABŞ və İran arasında əsir mübadiləsi çərçivəsində vəsaitlərin azad olunması planlaşdırılsa da, “HƏMAS”ın İsrailə hücumundan sonra Co Bayden administrasiyası bu prosesi dayandırmışdı.

Həmin dövrdə vəsaitlərin Qətərə köçürülərək humanitar məqsədlərlə — qida, dərman və tibbi ləvazimatların alınması üçün istifadə olunması nəzərdə tutulurdu və ABŞ Maliyyə Nazirliyinin nəzarəti altında saxlanılırdı.

Hazırda isə bu maliyyə vəsaitlərinin taleyi İslamabadda davam edən danışıqların əsas müzakirə mövzularından biri olaraq qalır.