Məlumata görə, bu mərhələ tərəflər üçün bir sıra mühüm məsələlər üzrə razılığa gəlmək baxımından “son şans” kimi qiymətləndirilir. Danışıqlarda İran tərəfdən Məhəmməd Baqir Qalibaf, Abbas Əraqçı və Əli Baqeri iştirak edir. ABŞ nümayəndə heyətində isə Ceyms Devid Vens, Stiv Uitkoff və Cared Kuşner təmsil olunur.

Danışıqlar çərçivəsində tərəflər əvvəlcə ekspert səviyyəsində birbaşa təmasları yekunlaşdırıb, daha sonra müzakirə olunan məsələlər üzrə yazılı protokolların mübadiləsinə başlayıblar. Prosesin texniki müzakirələrlə davam etdiyi və ehtiyac yaranacağı təqdirdə danışıqların müddətinin uzadıla biləcəyi qeyd olunur.

İlkin mərhələdə tərəflər arasında həm vasitəçilərin iştirakı ilə, həm də üzbəüz formatda görüşlər keçirilib. Pakistan rəhbərliyi, o cümlədən Baş nazir Şahbaz Şərif danışıqlarda vasitəçi rolunu üzərinə götürüb.

Məlumata əsasən, İran danışıqlara başlamazdan əvvəl bir sıra şərtlər irəli sürüb. Bunlar arasında İran aktivlərinin dondurulmasının ləğvi, münaqişələr zamanı dəyən ziyanın kompensasiyası, Hörmüz boğazı üzərində nəzarətin qorunması və uzunmüddətli atəşkəs razılaşmasının əldə olunması yer alıb.

Eyni zamanda, regionda gərginliklə bağlı məsələlər də gündəmdədir. Xüsusilə Livan ərazisində atəşkəs və Hizbullahın fəaliyyəti ilə bağlı mövzular müzakirə olunur.

Hazırda tərəflər arasında danışıqlar davam edir və yekun nəticələrin yaxın saatlarda açıqlanacağı gözlənilir.