ABŞ-nin vitse-prezidenti Ceyms Devid (Cey Di) Vens Prezident İlham Əliyevlə birgə mətbuata açıqlaması zamanı Azərbaycan haqqında xoş fikirlər səsləndirib.
O bildirib ki, Prezident Donald Trampla yanaşı, Prezident İlham Əliyev də dünyada türklər və israillilərlə yaxşı münasibətlərə malik liderlərdəndir. Vens bu məqamı vurğulayaraq, ölkə başçısının həm siyasi, həm də şəxsi keyfiyyətlərini yüksək qiymətləndirib.

ABŞ vitse-prezidenti çıxışında Azərbaycan mətbəxinə də toxunub:
“Burada yeməklər çox ləziz olmalıdır. İkincisi isə ölkə başçısı həqiqətən cəlbedici şəxsdir. Mən təsdiqləyə bilərəm ki, o, çox cəlbedicidir. Bir az sonra biz yeməkləri dadacağıq və əminəm ki, o da ləziz olacaq”, – deyə o bildirib.

Vens həmçinin əlavə edib ki, ikinci xanım ilə birlikdə Azərbaycanda olmaqdan və axşam təşkil olunacaq ziyafətdə iştirak edəcək olmaqdan məmnundur. O, bunu həm şəxsi baxımdan, həm də iki ölkə arasında dost münasibətlərin göstəricisi kimi qiymətləndirib.

Qeyd edək ki, ABŞ vitse-prezidenti Cey Di Vens fevralın 10-11-də Azərbaycana rəsmi səfər edib və səfər çərçivəsində Prezident İlham Əliyevlə görüşlər keçirib.