İran rəhbərliyi ABŞ-nin münaqişənin dayandırılması ilə bağlı irəli sürdüyü təklifə cavabını Pakistan vasitəçiləri vasitəsilə təqdim edib.

Bu barədə IRNA agentliyi öz mənbələrinə istinadən məlumat yayıb.

Məlumata görə, hazırkı danışıqlar mərhələsi yalnız regionda davam edən hərbi toqquşmaların dayandırılması məsələsini əhatə edir və daha geniş siyasi razılaşmalar hələlik gündəmdə deyil.

ISNA agentliyinin yaydığı digər xəbərdə isə bildirilir ki, İranın cavab məktubunda münaqişənin dayandırılması ilə yanaşı, Hörmüz boğazında gəmiçiliyin təhlükəsizliyinin təmin edilməsi barədə xüsusi müddəalar da yer alıb.

Qeyd edək ki, Fars körfəzi bölgəsində gərginlik mayın 7-si axşam saatlarında ABŞ və İran arasında qarşılıqlı zərbələrdən sonra kəskin şəkildə artıb. İranın dövlət teleradiosunun məlumatına görə, qarşıdurmaya ABŞ hərbçilərinin İran tankerinə hücumu səbəb olub.

Buna cavab olaraq, İran Hörmüz boğazı yaxınlığında ABŞ-yə məxsus üç esminesə raket və kamikadze dronlarla hücum həyata keçirib.

ABŞ Silahlı Qüvvələrinin Mərkəzi Komandanlığı isə hücum faktını təsdiqləyərək İran ərazisindəki hərbi obyektlərə cavab zərbələrinin endirildiyini açıqlayıb.

ABŞ Prezidenti Donald Tramp isə tərəflər arasında atəşkəsin qüvvədə olduğunu bəyan edib.

Hazırda regionda vəziyyət gərgin olaraq qalır və diplomatik kanallar vasitəsilə eskalasiyanın qarşısının alınması istiqamətində səylər davam etdirilir.