İran ABŞ ilə nüvə danışıqlarının bərpası istiqamətində yeni sülh təklifi irəli sürərək əvvəlki tələblərində müəyyən yumşalmaya gedib.

Realmedia.info xəbər verir ki, bu barədə “The Wall Street Journal” qəzeti mənbələrə istinadən məlumat yayıb.

Bildirilir ki, Tehran Hörmüz boğazının açılmasını İran limanlarına tətbiq olunan blokadanın aradan qaldırılması ilə eyni vaxtda həyata keçirməyi təklif edib. Halbuki əvvəllər İran blokadanın tam ləğvini danışıqlara başlamaq üçün ilkin şərt kimi irəli sürürdü.

Yeni təklifə əsasən, İran ABŞ-nin hərbi hücumları dayandıracağına dair təminat verilməsi və sanksiyaların ləğvi qarşılığında nüvə proqramı ilə bağlı məsələləri müzakirə etməyə hazır olduğunu bildirib.

Mənbələrin sözlərinə görə, Vaşinqton bu təklifə müsbət yanaşarsa, İran gələn həftə Pakistanda danışıqların növbəti mərhələsini keçirməyə hazırdır.

Bununla yanaşı, Hörmüz boğazında gəmiçiliyin təhlükəsizliyi və İranın nüvə proqramı kimi əsas məsələlərdə tərəflərin mövqelərinin hələ də ciddi şəkildə fərqləndiyi vurğulanır.