Azərbaycanın Milli Qəhrəmanı, Birinci Qarabağ müharibəsinin iştirakçısı İbad Hüseynovun təşəbbüsü ilə Xankəndi şəhərinin mərkəzi meydanında yerləşən “Qarabağ Qəhrəmanı” restoranının açılışı baş tutub.

Mayın 1-də keçirilən açılış mərasimi şəhərdə xüsusi maraqla qarşılanıb. Yeni fəaliyyətə başlayan restoran Qarabağın ürəyində həm yerli sakinlər, həm də şəhərə gələn qonaqlar üçün xidmət göstərəcək məkan kimi nəzərdə tutulur. “Qarabağ Qəhrəmanı” adı isə Azərbaycanın qəhrəmanlıq tarixini və milli ruhunu simvolizə edir.

Açılış mərasimində “Xocalı Soyqırımını Tanıtma” ictimai birliyinin Mətbuat xidmətinin rəhbəri Mövsümağa Ədalət oğlu da iştirak edib. O, tədbir zamanı yeni obyektin açılmasını Qarabağın dirçəlişi və bölgədə ictimai həyatın canlanması baxımından mühüm hadisə kimi dəyərləndirib.

İbad Hüseynov Birinci Qarabağ müharibəsində göstərdiyi igidliyə görə Azərbaycanın “Milli Qəhrəman” adına layiq görülüb. Onun Xankəndidə belə bir layihəyə imza atması həm tarixi yaddaşın yaşadılması, həm də regionun inkişafına töhfə kimi qiymətləndirilir.

Açılan restoranın şəhərin sosial və iqtisadi həyatına müsbət təsir göstərəcəyi, həmçinin turizm və xidmət sektorunun inkişafına dəstək olacağı bildirilir.

RealMedia.info olaraq qeyd edirik ki, Qarabağda həyata keçirilən hər yeni layihə Azərbaycanın gücünün, birliyinin və gələcəyə inamının göstəricisidir.