Bakı şəhəri Binəqədi rayonu ərazisində yerləşən Rüstəm Əliyev adına 3 nömrəli tam orta təhsil məktəbində Xocalı soyqırımının 34-cü ildönümünə həsr olunmuş anım mərasimi keçirilib. Tədbir məktəbin rəhbəri Almaz Həsrətin təşəbbüsü və təşkilatçılığı ilə baş tutub.

Anım mərasimində “Xocalı Soyqırımını Tanıtma ictimai birliyi”nin İdarə heyətinin üzvü Əziz İsmayılov və birliyin Ağsaqqallar Şurasının sədri Çingiz Bayramov fəxri qonaq qismində iştirak ediblər.

Tədbir Almaz Həsrətin açılış nitqi ilə elan olunub. Ardınca Azərbaycan Respublikasının Dövlət Himni səsləndirilib, daha sonra Xocalı şəhidlərinin əziz xatirəsi bir dəqiqəlik sükutla yad edilib.

Mərasimin bədii hissəsində məktəbin şagirdləri vətənpərvərlik ruhunda şeirlər səsləndirib, müxtəlif ədəbi-bədii kompozisiyalarla çıxış ediblər. Şagirdlərin ifasında səslənən şeirlər və təqdim olunan səhnəciklər Xocalı faciəsinin ağrı-acısını bir daha xatırladaraq iştirakçılara duyğulu anlar yaşadıb.

Daha sonra “Xocalı Soyqırımını Tanıtma” ictimai birliyinin Ağsaqqallar Şurasının sədri Çingiz Bayramov çıxış edərək şahidi olduğu hadisələrdən danışıb, Xocalı həqiqətlərinin gələcək nəsillərə çatdırılmasının vacibliyini vurğulayıb.

Birliyin İdarə heyətinin üzvü Əziz İsmayılov isə çıxışında ölkə başçısı, İlham Əliyevin rəhbərliyi ilə həyata keçirilən uğurlu siyasətdən bəhs edib, Xocalı həqiqətlərinin beynəlxalq aləmdə tanıdılması istiqamətində görülən işləri diqqətə çatdırıb. O, şagirdlərə müraciət edərək bu tarixi faciəni heç vaxt unutmamağı, eyni zamanda gələcəyə inamla baxaraq bilik və vətən sevgisi ilə böyüməyi tövsiyə edib.

Tədbirin sonunda Almaz Həsrət fəxri qonaqlarla birlikdə mənalı təşəbbüslə çıxış edib: Xocalı soyqırımının 34-cü ildönümü münasibətilə “Hərəyə bir ağac əkək – dünyanı yaşıllaşdıraq, təmiz nəfəs alaq, dünyada dava-dalaş olmasın, hamı bir ağacın kölgəsində cəm olsun” mesajı verilib. Bu təşəbbüs həm şəhidlərin xatirəsinə ehtiram, həm də sülh və həmrəylik çağırışı kimi dəyərləndirilib.

Qeyd edək ki, belə tədbirlər gənc nəslin milli yaddaş ruhunda formalaşmasına, tarixi həqiqətlərin unudulmamasına və vətənpərvərlik hisslərinin möhkəmlənməsinə mühüm töhfə verir.

Mənbə: RealMedia.info
Müəllif: “Xocalı Soyqırımını Tanıtma” ictimai birliyinin İdarə heyətinin üzvü Əziz İsmayılov