25 fevral 2026-cı il tarixində Bakı şəhəri 283 nömrəli tam orta məktəbdə Xocalı soyqırımının 34-cü ildönümünə həsr olunmuş anım mərasimi keçirildi. Tədbir məktəbin direktoru Nuridə Qarayeva Sabir qızının təşəbbüsü və təşkilatçılığı ilə yüksək səviyyədə baş tutdu.

Anım mərasimində “Xocalı Soyqırımını Tanıtma İctimai Birliyi”nin sədri Şamil Ələkbərli, birliyin İdarə Heyətinin üzvü Əziz İsmayılov, Vətən müharibəsi şəhidi, Azərbaycan Bayrağı ordenli Harun Alqayevin atası Məhəmməd Alqayev, eləcə də ictimai fəal Asif Hümbətov iştirak edirdilər.

Tədbir Azərbaycan Respublikasının Dövlət Himninin səsləndirilməsi və şəhidlərin əziz xatirəsinin bir dəqiqəlik sükutla yad olunması ilə başladı. Daha sonra məktəbin rəhbəri Nuridə Qarayeva çıxış edərək Xocalı faciəsinin Azərbaycan tarixində ən ağır və qanlı səhifələrdən biri olduğunu vurğuladı. O qeyd etdi ki, gənc nəslin milli yaddaş ruhunda böyüməsi, tarixi həqiqətləri dərindən bilməsi hər bir təhsil ocağının əsas vəzifələrindən biridir.

Məktəbin şagirdləri tərəfindən səsləndirilən şeirlər, ədəbi-bədii kompozisiyalar və səhnəciklər tədbirə xüsusi təsir bağışladı. Şagirdlərin çıxışları həm duyğusal, həm də vətənpərvərlik ruhunda hazırlanmışdı və iştirakçılar tərəfindən böyük rəğbətlə qarşılandı.

“Xocalı Soyqırımını Tanıtma” İctimai Birliyinin sədri Şamil Ələkbərli geniş və məzmunlu çıxış edərək 1992-ci ilin fevralında Xocalıda baş vermiş qanlı hadisələr barədə ətraflı məlumat verdi. O bildirdi ki, Xocalı həqiqətlərinin dünya ictimaiyyətinə çatdırılması hər bir azərbaycanlının mənəvi borcudur və bu istiqamətdə maarifləndirmə tədbirləri davamlı xarakter almalıdır.

Şəhid atası Məhəmməd Alqayev çıxışında oğlu – Vətən uğrunda canından keçmiş, Azərbaycan Bayrağı ordenli Harun Alqayevin həyat və döyüş yolundan danışdı. O, şəhid ailələrinin göstərilən diqqət və qayğıya görə minnətdarlığını ifadə etdi və gənclərə Vətənə sədaqətli olmağı tövsiyə etdi. Çıxışının sonunda oğlu haqqında yazılmış kitabı məktəbin direktoru Nuridə Qarayevaya hədiyyə etdi.

Daha sonra “Xocalı Soyqırımını Tanıtma” İctimai Birliyinin İdarə Heyətinin üzvü Əziz İsmayılov çıxış edərək Ümummilli Lider Heydər Əliyevin əziz xatirəsini dərin ehtiramla yad etdi. O, Ulu Öndərin əsasını qoyduğu dövlətçilik siyasətinin bu gün uğurla davam etdirildiyini vurğuladı. Əziz İsmayılov Azərbaycan Respublikasının Prezidenti, Ali Baş Komandan İlham Əliyevin uzaqgörən və qətiyyətli siyasəti nəticəsində ölkəmizin beynəlxalq aləmdə mövqeyinin daha da möhkəmləndiyini qeyd etdi. O bildirdi ki, cənab Prezidentin gördüyü işlər tarixə qızıl hərflərlə yazılacaq və bir vətəndaş olaraq bu siyasətlə qürur duyduğunu ifadə etdi.

Tədbirin sonunda bir daha vurğulandı ki, Xocalı soyqırımı qurbanlarının xatirəsi Azərbaycan xalqının qəlbində daim yaşayacaq və bu faciənin unudulmaması üçün maarifləndirmə işləri davam etdiriləcəkdir.


Müəllif: “Xocalı Soyqırımını Tanıtma” ictimai birliyinin İdarə heyətinin üzvü Əziz İsmayılov
Mənbə: RealMedia.info