Azərbaycanın ərazi bütövlüyünün bərpası naminə apardığımız haqq-ədalət mübarizəsində iştirak edən, Kəlbəcər rayonu istiqamətində düşmən təxribatının qarşısını alarkən şəhid olan Vətən övladlarının sırasında Səbuhi Fuad oğlu Əhmədovun adı daim hörmətlə anılır.

Səbuhi Əhmədov 1996-cı il dekabrın 21-də Sumqayıt şəhərində anadan olub. Uşaq yaşlarında valideynlərini itirdiyindən kiçik qardaşı Sənanla birlikdə Bakı SOS Uşaq Kəndində böyüyüb, orta təhsilini də burada alıb. Azərbaycan İqtisad Universitetinin nəzdində fəaliyyət göstərən Qida Sənayesi Kollecini bitirib. 2020-ci ilin əvvəlində Azərbaycan Ordusunun sıralarına qatılaraq gizir rütbəsində xidmətə başlayıb. Həmin ilin sentyabr ayında başlanan II Vətən müharibəsində iştirak edib. 2022-ci il sentyabrın 12-dən 13-nə keçən gecə Kəlbəcər rayonu istiqamətində erməni silahlı birləşmələrinin törətdiyi təxribatın qarşısını alarkən qəhrəmancasına şəhid olub. Bakıda Hərbi Memorial Məzarlığında dəfn edilib. Subay idi.

Aprelin 30-da Azərbaycan Respublikası “Xocalı Soyqırımını Tanıtma” ictimai birliyi və “Vətənpərvərlər” Maarifləndirmə ictimai birliyinin birgə təşkilatçılığı ilə şəhid Səbuhi Əhmədovun xatirəsinə həsr olunmuş anım tədbiri keçirilib.

Tədbiri “Xocalı Soyqırımını Tanıtma” ictimai birliyinin sədri Şamil Sabiroğlu açaraq şəhidin həyat və döyüş yolu haqqında məlumat verib. Azərbaycan Respublikasının Dövlət Himni səsləndirilib, Ümummilli Lider Heydər Əliyevin və bütün şəhidlərin əziz xatirəsi bir dəqiqəlik sükutla yad olunub. Daha sonra şəhidin həyatından bəhs edən videoçarx nümayiş etdirilib.

Tədbirdə Milli Məclisin deputatı Vüqar Rəhimzadə, deputat Ceyhun Məmmədovun köməkçisi Maqsud Əhmədzadə, “Vətənpərvərlər” Maarifləndirmə ictimai birliyinin sədri Aynur İsayeva, Qida Sənayesi Kollecinin direktor müavini Aytən Ağayeva, ictimai xadim Salman Əliyev, yazıçı-publisist Mətanət İmamquliyeva, “Xocalı Soyqırımını Tanıtma” ictimai birliyinin Mətbuat xidmətinin rəhbəri Mövsümağa Ədalət oğlu, ictimai birlik nümayəndələri, elm və təhsil xadimləri, şəhidin müəllimləri, dostları və yaxınları çıxış edərək onun Vətən uğrunda göstərdiyi şücaətdən, keçdiyi şərəfli ömür yolundan danışıblar.

Şairə Lətifə Rəşid şəhidə həsr etdiyi şeiri səsləndirib, Bakı Baza Tibb Kollecinin tələbələri ədəbi-bədii kompozisiya ilə çıxış ediblər. Vətənpərvərlik ruhlu mahnıları ilə tanınan bəstəkar və ifaçı Arif Səlimov da tədbirdə iştirak edib.

Səbuhi Əhmədovun tələbəlik dostu Pərvanə Babayeva çıxış edərək anım mərasiminin təşkilatçılarına minnətdarlığını bildirib.

Tədbir çay süfrəsi arxasında xatirələrin bölüşdürülməsi ilə davam edib.

Müəllif: Mövsümağa Ədalət oğlu
Bakı şəhəri, 01 may 2026-cı il