“Facebook” sosial şəbəkə platformasında bir sıra hesablarda Azərbaycan Prezidentinin adından “deepfake” texnologiyası ilə hazırlanmış, reallığı əks etdirməyən saxta açıqlama yayılıb.
Bu barədə “Qafqazinfo”ya Azərbaycan Respublikasının Medianın İnkişafı Agentliyindən (MEDİA) məlumat verilib.
Bildirilib ki, süni intellektin köməyi ilə hazırlanmış bu dezinformasiya nümunəsi ictimai rəyi çaşdırmağa, vətəndaşların fərdi məlumatlarını ələ keçirməyə və onlara maddi ziyan vurmağa yönəlib.
Qeyd olunub ki, son dövrlər “Facebook” platformasında oxşar məzmunlu kiberdələduzluq hallarına tez-tez rast gəlinir. Bu səbəbdən MEDİA “Facebook”un sahibi olan “Meta” şirkətini zərərli və saxta məzmunun aradan qaldırılması üçün operativ tədbirlər görməyə çağırıb.
Agentlik cəmiyyəti yalnız rəsmi mənbələrin yaydığı məlumatlara inanmağa, jurnalistləri və ictimai fəalları bu kimi hallara qarşı prinsipial mövqe nümayiş etdirməyə çağırıb. Eyni zamanda, saxta və yalan məlumatlara əsaslanan kampaniyaların, eləcə də “deepfake” texnologiyası ilə hazırlanmış məzmunların artdığı bir şəraitdə hər kəsi daha diqqətli və ayıq-sayıq olmağa səsləyib.