Bruney-Darüssalamın Sultanı Hacı Həssənal Bolkiah Azərbaycan Respublikasının Prezidenti İlham Əliyevə təbrik məktubu ünvanlayıb.

RealMedia.info xəbər verir ki, məktubda Azərbaycanın Müstəqillik Günü münasibətilə Prezident İlham Əliyevə, Azərbaycan Hökumətinə və xalqına səmimi təbriklər çatdırılıb.

Bruney Sultanı iki ölkə arasında otuz ildən artıq müddətdə formalaşmış dostluq münasibətlərini yüksək qiymətləndirdiyini vurğulayaraq, əlaqələrin gələcəkdə həm ikitərəfli formatda, həm də beynəlxalq təşkilatlar çərçivəsində daha da inkişaf edəcəyinə əminliyini ifadə edib.

Məktubda qeyd olunub ki, Bruney-Darüssalam və Azərbaycan arasında əməkdaşlığın Birləşmiş Millətlər Təşkilatı, İslam Əməkdaşlıq Təşkilatı və Qoşulmama Hərəkatı çərçivəsində də genişlənməsi arzu edilir.

Sultan Hacı Həssənal Bolkiah məktubunun sonunda Prezident İlham Əliyevə möhkəm cansağlığı və xoşbəxtlik, Azərbaycan xalqına isə davamlı tərəqqi və rifah arzulayıb.