Türkmənistanın Prezidenti Sərdar Berdiməhəmmədov Azərbaycan Prezidenti İlham Əliyevə Müstəqillik Günü münasibətilə təbrik məktubu göndərib.

Realmedia.info xəbər verir ki, məktubda Azərbaycan xalqına səmimi arzular çatdırılıb, ölkəmizin son illərdə iqtisadiyyat, infrastruktur və mədəniyyət sahələrində əldə etdiyi uğurlar yüksək qiymətləndirilib.

Sərdar Berdiməhəmmədov bildirib ki, mehriban qonşuluq, dostluq və qarşılıqlı anlaşma prinsiplərinə əsaslanan Türkmənistan-Azərbaycan münasibətləri dinamik şəkildə inkişaf edir və xalqların rifahı naminə əməkdaşlığın davam etdirilməsinə hazır olduqlarını vurğulayıb.

Türkmənistan Prezidenti İlham Əliyevə möhkəm cansağlığı, xoşbəxtlik və fəaliyyətində uğurlar, Azərbaycan xalqına isə sülh, əmin-amanlıq və firavanlıq arzulayıb.

Bundan əlavə, Türkmən xalqının Milli Lideri, Türkmənistan Xalq Məsləhətinin sədri Qurbanqulu Berdiməhəmmədov da Prezident İlham Əliyevi təbrik edib.

Təbrik məktubunda Türkmənistan-Azərbaycan münasibətlərinin müxtəlif istiqamətlər üzrə uğurla inkişaf etdiyi qeyd olunub, iki qardaş xalq arasında əməkdaşlığın bundan sonra da möhkəmlənəcəyinə əminlik ifadə edilib.

Qurbanqulu Berdiməhəmmədov dövlət başçısına möhkəm cansağlığı, ali vəzifəsində uğurlar, Azərbaycan xalqına isə sülh, tərəqqi və davamlı rifah arzulayıb.