Türkiyənin xarici işlər naziri Hakan Fidan İranın XİN rəhbəri Abbas Əraqçı və Pakistanın xarici işlər naziri Məhəmməd İshaq Dar ilə telefon danışığı aparıb.

Realmedia.info xəbər verir ki, bu barədə Türkiyə Xarici İşlər Nazirliyindəki mənbələr yerli mediaya açıqlama veriblər.
Bildirilib ki, telefon danışığı zamanı İran və ABŞ arasında davam edən danışıqlar prosesindəki son vəziyyət geniş şəkildə müzakirə olunub. Müzakirələrin digər detalları açıqlanmayıb.

Xatırladaq ki, ABŞ və İsrail 2026-cı il fevralın 28-də İrana qarşı hərbi əməliyyatlara başlayıb. Bu proses zamanı İranın ali rəhbəri Əli Xamenei və bir sıra yüksək vəzifəli şəxslərin öldürüldüyü iddia olunur.

Bundan sonra İran İsraillə yanaşı, ABŞ və müttəfiqlərinin regiondakı hərbi obyektlərinə qarşı addımlar ataraq Səudiyyə Ərəbistanı, Qətər, BƏƏ, Oman, Bəhreyn, Küveyt, İraq və Kiprdə müəyyən etdiyi hədəflərə zərbələr endirməyə başlayıb.

Məlumata görə, tərəflər aprelin 8-nə keçən gecə iki həftəlik atəşkəs barədə razılığa gəliblər. Daha sonra aprelin 11-12-də Pakistanın vasitəçiliyi ilə İslamabadda İran və ABŞ nümayəndələri arasında keçirilən danışıqlar isə tərəflər arasında fikir ayrılıqları səbəbindən nəticəsiz yekunlaşıb.