Realmedia xəbər verir ki, “Azərbaycan Dəmir Yolları” QSC (ADY) ilə Gürcüstanın aparıcı logistika şirkətləri və dəniz limanları arasında əməkdaşlıq imkanları müzakirə olunub.

ADY-nin sədri Rövşən Rüstəmovun Gürcüstana səfəri çərçivəsində PACE Group logistika şirkətinin rəhbərliyi, eləcə də Poti və Batumi dəniz limanlarının nümayəndələri ilə görüşlər keçirilib. Görüşlərdə iki ölkə arasında nəqliyyat-logistika sahəsində qarşılıqlı əməkdaşlığın genişləndirilməsi məsələləri diqqət mərkəzində olub.

Müzakirələr zamanı liman və dəmir yolu infrastrukturunun inteqrasiyası, yükdaşımaların artırılması, xüsusilə Orta Dəhliz üzrə tranzit potensialının daha səmərəli reallaşdırılması imkanları dəyərləndirilib. Tərəflər multimodal daşımaların inkişafının region üçün strateji əhəmiyyət daşıdığını vurğulayıblar.

Qeyd olunub ki, Azərbaycan və Gürcüstan limanları arasında koordinasiyanın gücləndirilməsi yük axınlarının artmasına, daşımaların sürətlənməsinə və logistika zəncirinin optimallaşdırılmasına mühüm töhfə verə bilər.

Görüşlər çərçivəsində Poti və Batumi limanlarının texniki imkanları, müxtəlif yük növlərinin emalı potensialı və gələcək birgə layihələr barədə fikir mübadiləsi aparılıb.