29 yanvar tarixində Tbilisi şəhərində “Azərbaycan Dəmir Yolları” QSC-nin (ADY) və “Marabda-Kartsaxi Dəmir Yolu” MMC-nin törəmə şirkətlərinin birgə müəssisəsi olan “BTKI Railways” MMC ilə “Gürcüstan Dəmir Yolları” SC arasında Bakı–Tbilisi–Qars (BTQ) dəmir yolu xətti üzrə birgə müəssisənin tam fəaliyyətə başlamasının təmin edilməsi məqsədilə müvafiq müqavilələr imzalanıb.

Realmedia xəbər verir ki, imzalanan sənədlər BTQ dəmir yolu xəttinin istismarının daha səmərəli təşkili, yükdaşımaların artırılması, idarəetmə mexanizmlərinin təkmilləşdirilməsi və tərəflər arasında koordinasiyanın gücləndirilməsini nəzərdə tutur.

Qeyd olunub ki, bu addım Bakı–Tbilisi–Qars dəmir yolu xəttinin regional və beynəlxalq yükdaşımalarındakı rolunun daha da artırılmasına, Orta Dəhliz üzrə logistika imkanlarının genişlənməsinə mühüm töhfə verəcək.

Müqavilələrin icrası nəticəsində BTQ xətti üzrə daşımaların həcminin artacağı və nəqliyyat proseslərinin daha çevik və dayanıqlı şəkildə həyata keçiriləcəyi gözlənilir.