Azərbaycanın 2026-cı il üçün “İdman paytaxtı” seçilən Qazax şəhərinin rəsmi loqosu ictimaiyyətə təqdim edilib.
Realmedia xəbər verir ki, Gənclər və İdman Nazirliyinin yaydığı məlumata əsasən, loqoda Qazaxın əsas rəmzlərindən olan Göyəzən dağı və Dilbaz atı əksini tapıb. Layihənin əsas ideyası şəhərin idman ruhunu və dinamizmini ön plana çıxarmaqdır. Bu konsepsiya “Qazax – hərəkətə qoşul!” şüarı ilə ifadə olunub.
“İdman paytaxtı” layihəsi çərçivəsində hazırlanan maskotda isə gənc idmançı obrazı Qazaxa xas aşıq sənətinin simvolu olan sazla təqdim edilib. Qeyd olunur ki, həm şüar, həm də maskot süni intellekt texnologiyalarının köməyi ilə hazırlanıb.
Xatırladaq ki, Qazax şəhərinin 2026-cı il üçün Azərbaycanın “İdman paytaxtı” seçilməsi ilə bağlı qərar 2024-cü il dekabrın 16-da Gənclər və İdman Nazirliyinin Kollegiya iclasında keçirilən səsvermə nəticəsində qəbul olunub.
Qeyd edək ki, bu statusu 2024-cü ildə Quba, 2025-ci ildə isə Qəbələ şəhəri daşıyıb.