Azov dənizində gəmilərə edilən hücum zamanı həlak olan Azərbaycan vətəndaşlarının cənazələrinin ölkəyə gətirilməsi istiqamətində işlər davam etdirilir.

Realmedia.info xəbər verir ki, bu barədə Azərbaycan Xarici İşlər Nazirliyi məlumat yayıb.

Bildirilib ki, aparılan axtarış-xilasetmə tədbirləri nəticəsində 1969-cu il təvəllüdlü Qismət Əliyev və 1981-ci il təvəllüdlü Fuad Orucovun nəşləri aşkar olunub.

XİN-in məlumatına əsasən, müvafiq prosedurlar başa çatdıqdan sonra nəşi tapılan dörd Azərbaycan vətəndaşının cənazələrinin ölkəyə gətirilməsi nəzərdə tutulur.

Həmçinin qeyd olunub ki, cənazələri müşayiət edən və hazırda Rusiyanın Yeysk şəhərində qalan iki Azərbaycan vətəndaşı da yaxın günlərdə Vətənə yola salınacaq.

Azərbaycanın aidiyyəti qurumları və diplomatik nümayəndəlikləri prosesin operativ şəkildə həyata keçirilməsi istiqamətində fəaliyyətlərini davam etdirirlər.