Azərbaycanda akkreditə olunmuş diplomatik korpusun nümayəndələrinin Qarabağ və Şərqi Zəngəzur iqtisadi rayonlarına səfəri davam edir.

Realmedia.info xəbər verir ki, səfərin ikinci günündə nümayəndə heyəti Laçın rayonuna yola düşüb.

Səfər çərçivəsində diplomatların Laçın şəhərində yerləşən “Zerti Aqro Sənaye Parkı”nda fəaliyyət göstərən tikiş, mebel və ayaqqabı fabrikləri, efir yağları istehsalı və heyvan saxlama müəssisələri, həmçinin istixana və fidanlıq kompleksləri ilə tanışlığı planlaşdırılır.

Bundan əlavə, onların “Laçın” İstirahət Kompleksini də ziyarət etməsi nəzərdə tutulur.

Bundan əvvəl diplomatik korpusun nümayəndələri Şuşada inşa edilən məscidə baş çəkib, daha sonra Xalça Muzeyini ziyarət ediblər. Diplomatlar həmçinin Qazançı kilsəsində olub, Azərbaycanın çoxkonfessiyalı irsinin qorunması istiqamətində görülən işlərlə tanış olublar.

Şuşa Müalicə-Sağlamlıq Mərkəzində olan qonaqlar işğaldan azad edilmiş ərazilərə qayıdan əhali üçün tibbi xidmətin yaxşılaşdırılması istiqamətində görülən işləri yüksək qiymətləndiriblər.

Qeyd edək ki, Qarabağ və Şərqi Zəngəzura təşkil edilən ikigünlük səfərdə ümumilikdə 62 ölkə və beynəlxalq təşkilatdan 150-dən çox səfir, diplomat, hərbi attaşe və digər nümayəndə iştirak edir.

Diplomatik korpusu Azərbaycan Prezidentinin köməkçisi, Prezident Administrasiyasının Xarici siyasət məsələləri şöbəsinin müdiri Hikmət Hacıyev müşayiət edir.

Bu, işğaldan azad edilmiş ərazilərə diplomatik korpus nümayəndələrinin sayca 21-ci səfəridir. Bu cür səfərlər bölgədə həyata keçirilən bərpa və inkişaf layihələrinin miqyasını nümayiş etdirmək baxımından mühüm əhəmiyyət daşıyır.