Türkiyənin Milli Müdafiə Universitetinin (MMU) rektor müavini, professor Talat Canbolatın rəhbərlik etdiyi nümayəndə heyəti işğaldan azad edilmiş ərazilərə səfər edib.

Realmedia.info xəbər verir ki, bu barədə Azərbaycan Müdafiə Nazirliyi məlumat yayıb.

Bildirilib ki, səfər çərçivəsində türkiyəli qonaqlar bölgədə yerləşən bir sıra tarixi və mədəni abidələri ziyarət ediblər.

Nümayəndə heyətinə Ermənistan silahlı qüvvələri tərəfindən törədilmiş vandalizm aktları, dağıntılar, həmçinin Azərbaycan Prezidenti, Müzəffər Ali Baş Komandan İlham Əliyevin rəhbərliyi ilə azad edilmiş ərazilərdə aparılan genişmiqyaslı bərpa və yenidənqurma işləri barədə ətraflı məlumat verilib.

Görüşlər zamanı hərbi qulluqçular 44 günlük Vətən müharibəsi və digər uğurlu əməliyyatlarla bağlı xatirələrini bölüşüblər.

Bundan əlavə, nümayəndə heyəti N saylı hərbi hissəni ziyarət edərək burada yaradılmış şəraitlə tanış olub. Qonaqlara torpaqların azadlığı və ölkənin ərazi bütövlüyü uğrunda döyüşən bölmələrin keçdiyi şərəfli döyüş yolu haqqında geniş məlumat təqdim edilib.

Səfərin sonunda tərəflər arasında qarşılıqlı hədiyyələr təqdim olunub və xatirə şəkilləri çəkdirilib.

Qeyd edək ki, Türkiyə MMU-nun nümayəndə heyətinin proqramına uyğun olaraq Əlahiddə Ümumqoşun Ordunun da ziyarəti nəzərdə tutulur.