Emin Əmrullayev Xankəndi və Xocalı şəhərlərinə səfəri çərçivəsində bir sıra təhsil müəssisələrində olub, tədris prosesi və yaradılmış şəraitlə tanış olub.

Nazir ilk olaraq Xankəndi şəhərinin Kərkicahan qəsəbəsində yerləşən 1 nömrəli tam orta məktəbdə olub. Burada dərs prosesini izləyən Emin Əmrullayev məktəbdə yaradılmış müasir tədris mühiti ilə tanış olub, müəllim və şagirdlərlə söhbət edib.

Görüş zamanı işğaldan azad olunmuş ərazilərdə məktəblərin fəaliyyətinin bərpası, müasir infrastrukturun yaradılması və keyfiyyətli təhsil mühitinin formalaşdırılması istiqamətində ardıcıl işlərin görüldüyü vurğulanıb.
Səfər çərçivəsində nazir Xankəndi şəhəri 1 nömrəli körpələr evi-uşaq bağçasında da olub. O, burada təlim-tərbiyə prosesinin təşkili ilə tanış olub və uşaqların iştirakı ilə keçirilən Novruz şənliyini izləyib.

Daha sonra Emin Əmrullayev Xocalı şəhəri 1 nömrəli tam orta məktəbdə tədris prosesini izləyib, müəllim və şagird kollektivi ilə görüşərək məktəbdə yaradılmış şəraitlə tanış olub.

Səfər zamanı nazir məktəbin Uşaqlarla məktəbdənkənar və sinifdənxaric tərbiyə işi üzrə təşkilatçısı Nazilə Məmişovanın ailəsini də ziyarət edib. Bildirilib ki, onun atası və qardaşı Vətən uğrunda şəhid olublar. Nazir görüş zamanı şəhidlərin xatirəsinin hər zaman böyük ehtiramla yad edildiyini və onların qəhrəmanlığının heç vaxt unudulmayacağını vurğulayıb.