Azərbaycanın Xarici İşlər Nazirliyi (XİN) Birləşmiş Ərəb Əmirliklərində qalan Azərbaycan vətəndaşlarının təxliyəsi ilə bağlı məlumat yayıb.

Bildirilib ki, Əbu-Dabi və Dubay şəhərlərində qalan 195 Azərbaycan vətəndaşının ölkəyə gətirilməsi istiqamətində tədbirlər görülür. Təxliyə prosesi Azərbaycanın diplomatik nümayəndəlikləri və aidiyyəti qurumların koordinasiyası ilə həyata keçirilir.

Qeyd olunub ki, regionda yaranmış gərgin vəziyyət və bəzi hava məkanlarının bağlanması səbəbindən xaricdə qalan vətəndaşların təhlükəsiz şəkildə ölkəyə qaytarılması üçün işlər davam etdirilir.

XİN-in məlumatına görə, ilkin siyahıyaalma nəticəsində Yaxın Şərqdə yerləşən bir neçə ölkədən ümumilikdə 1000-ə yaxın Azərbaycan vətəndaşı təxliyə üçün müraciət edib. Onların mərhələli şəkildə Azərbaycana gətirilməsi planlaşdırılır.

Nazirlik vətəndaşlara müraciət edərək xaricdə olan Azərbaycan vətəndaşlarının ölkənin diplomatik nümayəndəlikləri ilə əlaqə saxlamalarını tövsiyə edib.