Qərbi Azərbaycan İcması ABŞ Prezidenti Donald Trampın iştirakı ilə 2025-ci il avqustun 8-də Vaşinqtonda keçirilmiş tarixi zirvə görüşündən sonra Azərbaycan-Ermənistan normallaşma prosesində müşahidə olunan müsbət dinamikaya baxmayaraq, Ermənistanda və ondan kənarda sülhə qarşı yönəlmiş bir sıra cəhdlərdən narahatlıq ifadə edib.

Realxeber.info xəbər verir ki, İcma bununla bağlı bəyanat yayıb.

Bəyanatda vurğulanır ki, Ermənistanda məhkəmənin Samvel Şahramanyan adlı şəxsin qondarma qurumun “özünü buraxması barədə qərarı”nın güc tətbiqi və ya təhdid altında verilməsi və buna görə hüquqi qüvvəyə malik olmaması barədə çıxardığı qərar təxribatçı xarakter daşıyır.

“Bu məhkəmə qərarı açıq-aşkar Azərbaycanın suverenliyinə və ərazi bütövlüyünə qarşı yönəlib. Ermənistan məhkəməsi hansı əsasla, hansı mandatla suveren bir dövlətin daxili işlərinə qarışır?” – deyə bəyanatda qeyd olunub.

Qərbi Azərbaycan İcması həmçinin bu qərarı Ermənistanda 2026-cı il parlament seçkiləri öncəsi revanşist qüvvələrin sülhə qarşı fəaliyyəti kimi qiymətləndirib. Bəyanatda vurğulanır ki, əgər Ermənistan məhkəməsi iki xalq arasında sülh və barışığa töhfə vermək niyyətindədirsə, onda Qərbi azərbaycanlıların dədə-baba yurdlarından deportasiya olunmasını, qəbristanlıqların və məscidlərin dağıdılmasını pisləyən qərarlar çıxarmalıdır.