Ekspertlər bildirirlər ki, Ermənistan daxilində sülhün gətirəcəyi real faydalar artıq daha aydın görünür. Azərbaycanın bütün istiqamətlərdə güclü mövqeyə malik olduğunu vurğulayan analitiklər, Ermənistanda sülh və dinc qonşuluq siyasətinin gətirəcəyi üstünlüklərin də anlaşıldığını qeyd edirlər. 2026-cı ilin iyun ayında Ermənistanda keçiriləcək parlament seçkilərindən sonra vəziyyətin tam aydınlaşacağı və sülhə doğru konkret addımların gələn ilin sonuna qədər atılmasının mümkünlüyü bildirilir.
Zəngəzur dəhlizi məsələsi ilə bağlı isə region dövlətlərinin mövqelərinin birmənalı olmadığı vurğulanır. Ekspertlər hesab edirlər ki, həlledici qərar Ermənistan tərəfindən veriləcək. Əgər İrəvan düzgün qərar verərsə, heç bir tərəf buna qarşı çıxmayacaq. ABŞ-ın dəhliz layihəsinin arxasında dayanması isə Ermənistana əlavə stimul rolunu oynayır, çünki ABŞ Prezidenti Donald Trampın iştirakı ilə əldə edilmiş razılaşmaya qarşı çıxmaq çətin olacaq.