Realmedia.info xəbər verir ki, iyunun 5 və 6-da IV və VI siniflər üzrə keçiriləcək monitorinqlərlə əlaqədar bəzi ümumtəhsil məktəblərində tədris prosesi distant formada təşkil olunacaq.

Bakı Şəhəri üzrə Təhsil İdarəsinin məlumatına görə, iyunun 5-də monitorinq mərkəzi kimi müəyyən edilmiş 108 məktəbdə IV siniflər istisna olmaqla digər siniflər üzrə dərslər məsafədən keçiriləcək. İyunun 6-da isə 6 günlük iş rejimində fəaliyyət göstərən və monitorinq mərkəzi seçilmiş məktəblərdə VI siniflərdən başqa bütün siniflər üçün tədris distant formada aparılacaq.

Qeyd olunub ki, monitorinq nəticələri şagirdlərin summativ qiymətləndirilməsinə və sinifdən-sinfə keçidinə təsir göstərmir. Monitorinqin əsas məqsədi şagirdlərin bilik və bacarıqlarının qiymətləndirilməsi, təhsil standartları üzrə nailiyyət səviyyəsinin müəyyənləşdirilməsi və tədrisin keyfiyyətinin artırılmasıdır.

Məlumata əsasən, monitorinqdə 300 mindən çox IV və VI sinif şagirdinin iştirakı nəzərdə tutulur. Onlardan 13 min 552 nəfəri kompüter əsaslı monitorinqə cəlb ediləcək. Bu il ilk dəfə olaraq monitorinq tapşırıqlarına açıq tipli suallar da daxil ediləcək.

Bununla bağlı valideyn qruplarına əvvəlcədən məlumatlandırıcı bildirişlər göndərilib.