Azərbaycanda məktəblərdə hər il şagird sayı təhlil edilir və əsas məqsəd təhsil sisteminin daha səmərəli qurulması, eyni zamanda təhsilin keyfiyyətinin artırılmasıdır.

Bu fikirləri jurnalistlərə açıqlamasında Azərbaycanın elm və təhsil naziri Emin Əmrullayev azsaylı şagirdi olan məktəblərin birləşdirilməsi məsələsinə münasibət bildirərkən deyib.

Nazirin sözlərinə görə, hazırda bu istiqamətdə iki əsas model üzərində iş aparılır.

Birinci istiqamət şagirdlərin nəqliyyat vasitələri ilə daha böyük məktəblərə daşınmasıdır. O bildirib ki, azsaylı şagirdi olan məktəblərlə müqayisədə böyük məktəblərdə tədrisin keyfiyyəti daha yüksək olur. Bu, həm şagirdlərin sosiallaşmasına, həm də gələcək inkişafına müsbət təsir göstərir.

İkinci istiqamət isə 20-25 nəfər şagirdi olan məktəblərlə bağlıdır. Nazir qeyd edib ki, bu məktəblərdə hazırda daşınma sistemi tətbiq olunsa da, bu ildən distant təhsil modeli üzərində də iş aparılır.

Emin Əmrullayev vurğulayıb ki, yeni modelə əsasən, kiçik məktəblər fəaliyyətini dayandırmadan onlayn tədris həyata keçirə biləcək. Belə ki, məktəb öz yerində qalacaq, müəllim isə başqa məkandan distant şəkildə dərs keçəcək.

Nazir əlavə edib ki, yay aylarında şagird sayı yenidən təhlil olunduqdan sonra bu istiqamətdə işlərin davam etdirilməsi planlaşdırılır.